Plantun de Prouvènço

Pèr coumpara dos planto d'encò nostre

Ranunculus serpens & Picea abies

Ranunculus serpens

Ranunculaceae

Nom en français : Renoncule radicante.

Descripcioun :
Lou ranouncle-radicant trachis dins li bos clar de colo e de mountagno sus cauquié. Sèmblo au ranouncle-croucu e pousso un pau dins li mémi relarg (coume au Ventour). Se n'en destrìo pamens que li flour soun un pau mai grosso e pu jauno e subretout qu'a li pecou rega (fotò). Coumpara adounc emé lou ranouncle-croucu que ié sèmblo proun. La subsp. presentado eici ié dison serpens .

Usanço :
Coume tóuti li ranouncle, es uno planto empouisounanto, pamens couneissèn pas d'usanço particuliero. Escriéure au site se n'en sabès mai.

Port : Erbo
Taio : 10 à 60 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Ranunculus
Famiho : Ranunculaceae

Ordre : Ranunculales

Coulour de la flour : Jauno
Petalo : 5
Ø (o loungour) flour : 1,5 à 2,5 cm
Flourido : Printèms - Estiéu

Sòu : Ca
Autour basso e auto : 0 à 2300 m
Aparado : Noun
Abriéu à setèmbre

Liò : Prado umido - Faio - Pelouso - Bos clar
Estànci : Subremediterran à Mountagnard
Couroulougi : Éuropenco
Ref. sc. : Ranunculus serpens Schrank., 1789 (= Ranunculus nemorosus subsp. serpens (Schrank) Tutin )

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.